Verfügbare Informationen zu "MEMO BOM KAMO ?"
Qualität des Beitrags: Beteiligte Poster: dersim Forum: DERSÝM-ZAZA ARÞÝVÝ Forenbeschreibung: Dersim-Zaza Platformu aus dem Unterforum: NUSNEY : YAZILAR Antworten: 10 Forum gestartet am: Dienstag 05.12.2006 Sprache: türkisch Link zum Originaltopic: MEMO BOM KAMO ? Letzte Antwort: vor 17 Jahren, 4 Monaten, 14 Tagen, 5 Stunden, 49 Minuten
Alle Beiträge und Antworten zu "MEMO BOM KAMO ?"
Re: MEMO BOM KAMO ?
dersim -MEMO BOM KAMO ?
Memo Bom Kamo?
Memo Bom, Nasrettin Xocê Dêsımiyo. Sayiro de gırso.
Memo Bom Bêxızo. Bêxu, en jê de dewanê Gımgımi (Varto), Xınıs u Asqale de estê.
Memo Bom, Bostan Wertiye rawo, ya ki en jêde na dewe de mendo, coka cıra vanê Bostan Wertiye ra Memo Bom. Rasta xo, wo Dewızê (maravê) Çê Mire Begi biyo (Çê Sawuşen Begi). Ca ve ca, dewe ve dewe vuriyo ra. Vanê, Mem kata sono şêro, lewê sari de, Çê Miri ra qesa xıravıne, qesa çorte nevata. Hama her kes zaneno, qesê Memi hazırê, kam beno bıbo, yêk ri de vano.
Memi, xo ra Bom vatenê. Coka namê xo, biyo Memo Bom, hini amo nas kerdene. Ezı ki yita ge Bom nusnon, ge Mem nusnon, ge ki Memo Bom nusnon. Ni pêro namê diyê. Hama na namê kerdene de, heqeret ya ki qız vinitene çina. Çutıri vajiyo, çutıri khe qolay amo vatene, hini nusnonu. Namê xuyo rast Memedo. Yi khe qesey kerdene, “Memê to”, “Memê sıma” ki vatene.
Memo Bom, hazar u new se u seştu new de (1969) merd. Wo ve Alisan Begê Çarekıji ra jüvini ra nejdi merdi. Alisan Beg, Çê Miri ra bi. Cipê Alisan Begi, Derê Balavanu de raê ra vejiyay bi, gınayve çhemi rê. Vanê, cenaza Alisan Begi sere 3500 (hire hazar u phonc sey), yê Memê Bomi serê 7000 (hawt hazari) pangılote (pangınote) biya arê.
Mesela Hese de, vanê Çê Miri sungi, riveşi vastê. Mem rusno khe, arê do, biya ro. Mem sono, Hese de vejino. Taê vanê, hese ve khudiganê xo ra pia biyê. Taê vanê, hese qızane biya, eve Heşi ra pia biyê. Vanê, hesê raveri qarısê cı nebiya, eke kota düri, Memi cı ra xeveri do, hese cêra ra, Mem gureto pê, goni u gonaşir de verdo. Mem, xo ra vêrdo, xo no ro merdene. Hesê şiya khe çale bıkıno, Memi cı kero. Memi çutır khe fırsan diyo, xo tırr re esto. Gındır biyo, şiyo fekê deri de vınıto. Pêydena amo ra xo khe, hao zerrê ağwe de ro. Wurzeno ra sono. Endi çutıri sono, zu Mem zaneno,....!
Vanê, hesê Mem zaf zeberno, sarrê çermey kerdo, lewi dırnê, wertê hermu ra gost veto. Halê Memi zaf berbat biyo, yanê xori biyo dırvetin. Çê Miri no esto aravê xo, berdo suke. Seşt roze, newesxane (xestexane) de mendo.
Memo Bom, feqır asenê, kınc u kolê xo khani bi, khortıkın bi, hama hini jêde feqırı ki nêbi. Şênê xo tım ra kerde bi, pırçın (rameti şêro re cı, jê heşi tukın) bi. Mı zu raê nejdi ra divi. Derê Balavanu de ameyve qewa Çê Bava Sawuşêni (Sa Wuşêni). Se khe bi nejdiyê qewa, qewa u wo nejdi de kam khe esto, dormê dey guret, sere bi arey (bi topi). Serre, hazar u new se u seşt u hawt ya ki seşt u heşti biye, (1967/68), payız bi. Ez wo taw mektev de biyu, mektev lewê qevade bi. Ma domanu rê qewa şiyaene yasağê biye. Coka ma qewa nêkewtime, hama çımê ma çever de bi.
Ez hini guman kon khe, mesela cığara fısqi, zu raê nê, dirê rey ama Memê Bomi sarrê de. A roze ki, wuncia çiyo de nianen biyo, Memi qesey vatê, wuyo khe cığara fısqi dayve cı, amo khe pıro do. Hama sari nêver do. Zu mesela de niaenê Munzur Comerdi nusnayvi. Mı ki na mesela hesnay vi, dunıka mı de nuşiyayiya. Hata nıka mı naê ra hire versiyoni hesnay. Na mesela ra dı versiyonu, cêr de nusnonu.
Memo Bom khe vajiya, çı yeno ra mordemi virri: (Memo Bom deyince akla ilk gelenler):
Pamuxe: Pamuxe, hera Memê Bomiya. Memo Bom, bê hera xuya Pamuxe caê nêşiyene, nêşiyo. Tım tey biya.
Gunê qurvu: Memê Bomi en jêde na çhekuyê ra cav dêne.
Mordem khe bese bıkero, xona Memê Bomi sere zaf malumat vineno. Taê nas kerdoğê Memê Bomi xona wesê. Mordem bese keno ninu ra xona xeyle çi bıhesno, arê do. Hama meselê dey, zafi ki vuriyê. Mordem bese keno, ni meseley koti vajiyê, lewê kami de vajiyê ya ki kami ser vajiyê, yinu ra pia qeyd kero.
Kılamanê Memedi ra mı xora jüye pêda kerde. Hama kılamê Memê Bomi zafê. Meselanê deyra ki, mı daese teni nusnayvi. Ninu ra tayine bınê ni nuşni de nusnonu.
Memê Bomi serê, Fecira u Munzur Comerdi, nusnêo de hewl, Berhem de nusnayvi, (Berhem, Sosyal ve Kültürel Araştırma Dergisi, Haziran, 1992/2). Na nusne de heqa Memi de xeyle çi nuşiyo.
Wastena mı, destê kami de khe heqa Memi de çiyê esto, çiyê zaneno, yi eskera kero, bınusno, qeyd kero. Kami de khe resmê Memi, kasetê Memi estê, yinu rındek bıseveknê hama hemi ki eskara kerê. İla ki çiyo nianen qeyd bo. Kam khe Memi nas keno, heqa dey de çıyê zaneno, beno khe nêşikino bınusno. Alvazê ma, mordemê nianeni khe dos kerdi, yinu qesey kerdene dê, qesey kerdena dinu qeyd kerê u bınusnê.
M. Tornêğeyali
Nisane, 2006
[url]: http://f25.parsimony.net/forum62148/messages/23451.htm
[img=http://img241.imageshack.us/img241/8199/memobombw0.th.jpg]
Re: MEMO BOM KAMO ?
dersim -MEMÊ BOMI RA DIRÊ ZARAVEY
Cığara Fısqi-1
Cığara Fısqi ve Memo Bomi ra
Memo Bom, rozê, sono çê Ali Rızê Qırği¹. Ali Rızaê Qırği, Bomi ra pers keno, vano: “Memed, ça qılawun nêsımena?”
Mem vano, “Ağa tutın çino.” Ali Rızaê Qırği vano:
“Sandıqa Xatune de qaçağ esto, hama qağıti çinê.” Mem vano:
“Kağıti mı de bolê.”
Ali Rızaê Qırği, kağıtu cêno sono. Tenê fısqi keno werte, cığara keno de, ano, dano Memi.
Mem cığara cêno, fırtê ğunceno, ferq keno khe fısqi tede ro, hama beli nêkono. Ali Rızaê Qırği, pers keno, vano:
“Bomo, weso?” Mem vano:
”Ağa, weso!” Fırtêna ğunceno. Ağa, wuncia pers keno, vano:
“Bomo, weso?” Mem vano:
“Serefê tüyo Ağa, weso!” Fırtêna ğunceno.
Ağa, raê hireyine khe pers keno, Memo Bom vano:
“Weso, weso!
No yê çar lıngeo,
Yê dı lınga xo ki cıke,
Va şêro, dest u roê ma u piyê to reso.” :!:
Ağa wurzeno ra, sesadırê² xo ğunceno khe pano. Mem vano: “Nê, Ağa! Soysıji hurendi ke! Şimê cematê heqiye, eke Bom neqo, pane, bıkise! Eke, neq niyo, xona cırmê to gırano.
Sonê Zağgeriye³, Çê Ponci. Çê Ponci, Sawliyê. Cemat yeno pêser, mesela qesey bena. Cemat de, qerar danê ra cı, vanê:
“ Bom heqliyo (neq niyo), hata çê Heqi.”
Bom vano: “Ağa, ra wurze, se pangınote (pangılote) u dı kiloy tutunê mı biya, xorê ez bicêri, şêri!”
Çıme: Mazra Sılêmanu ra Mıstafaê Keşki, 4).
Nustoğ u qeydkerdoğ: M. Tornêğeyali
Ca u Tarıx: Amnan 2002, Miandonıke/Pulêmoriye
¹.Ali Rızaê Qırği, Tivnige rawo. Pilanê Qırğu ra bi. Mordemo de namdar u çhêr bi. Peydena hetê lazanê Tivnige ra amo kistene. Tivnige, dewa Monsewa (Çayırliye), namê xuyo newe ‘Ortaköy’ya.
².Sesadır: Tavançeo (davançeo), ses qursuni guretene. Mem, cıra ‘soysız’ vano.
³.Zağgeriye:
(4). Na mesela Mıstafaê Keşki qesey kerde. Hama hini aseno khe na mesela zovina cau de ki biya. Munzur Comerdi ki naê ra jüye nusna.
[url]: http://f25.parsimony.net/forum62148/messages/23453.htm
Re: MEMO BOM KAMO ?
dersim -ÇIYÊ MERDU
Çiyê Merdu¹
Rozê, çê Miri² de çiyê merdu yeno daene. Beg eve xo, nun ğuntene rê nezaret keno. Riyê sılxetiye ra sar qor ve qor niseno ro. Mem, qoro vıren de weno, hurênda xo ra, ra nêwurzeno. Qorê dıdine de weno, wuncia nêlewino. Qorê hireyine de khe niseno ro, Beg³ vano:
„Memo, to xona mırd nebiya?“
Mem vano:
„Gunê qurvu,
to hire se u seşt u ses (4) dewu wena, mırd nêbena, ez hire qori nuni ra çutıri mırd bi?“ :roll:
M. Tornêğeyali
10.02.2000
¹. Meselae de nianenê hete Munzur Comerdi ra ama nusnaene. Beno khe na mesala niane zu raê nê, hama dire rey biya. Ya ki fek ve fek qesey biya, vuriya.
².Çê Miri: Çê Sawuşên Beği ra vajiyene. Sawuşen Beg (Şah Hüseyin Bey), Mirê Dêsımi biyo. Çê Sawuşên Begi, hemı ki pilê aşira Çareku bi. Waxtê Memê Bomi de, Pilê çê Miri kam biyo? Na mesela wo taw/(u) vêrda ra.
³.Tayine ra gore, na qese hetê miri ra nê, hete cêniya Miri ra amo vatene, (vajiyo).
(4).Hire se u seşt u ses (366) dewi: Taê vanê, hire se u seşt u phonc (365) dewi.
[url]: http://f25.parsimony.net/forum62148/messages/23455.htm
Re: MEMO BOM KAMO ?
dersim -Çüyo Ciyin
Çüyo Ciyin
Rozê, Memo Bom şiyo zu dewe¹. Sar dorme de yeno tê arê, kunê ra Memi. Mordemê dızdeni çüyê Memi cêno, beno, hurdemena hetu ra keno ci ra, ano, lewe de nano ro. Pêydena Mem çüyê xo cêno, wurzeno ra khe şêro. Ci beno destê Memi ra. Wuyo khe xınzırêni kerda,(çü kerdo ci ra) vano:
„Memo, wo çıko?“.
Memi vato:
„Gunê qurvu:
No çüyo. Niyo khe pırao, ciyo. Wo ki samiya piyê tüyo“. :oops:
M. Tornêğeyali
10.02.2000
¹. Qaçağu ra (Qaçağanê Hermeniyu: Ermeni Kaçağı: Balyayla) Wuşênê Heyderıji, mı ra va, na mesela dewa Almeliye de (Almeliya Aliyu: Elmalı) vêrda ra. M. Comerdi ki jüya de nianene nusna. Eke rasta, kam khe zaneno, koti biya, bınusno.
[url]: http://f25.parsimony.net/forum62148/messages/23456.htm
Re: MEMO BOM KAMO ?
dersim -Memo Bom ve Birakê Cênike ra
Memo Bom ve Bırakê Cênıkê ra
Memo Bom, sono zu dewe. A dewe de Çêyê de beno meyman. Çêo khe biyo meyman, o rozê, bırakê wayıra çêyi ki wuza (meyman) biyo. Wayıra çêyi, sonde cılu kena ra. Wo taw, bırakê xo tevera biyo. Vana, ‘Memed na cıla tüya, (name dana we) na ki cila deyi ya”. Mem Bom vano, tamam. Cênıke sona. Memo Bomi ki, sono, kuno cıla yi mêrıki. Mêrık yanê Bırakê cênıke sono zerre, kuno cıla thale. Nia dano khe cênıke nina, xo rê hewına sono. Peydena cênıke sona, kuna cıle (cıla Memi). Mem hazır, sere vınetiyo. Xıl beno, niseno rê ser. Karê xo xelesneno. Cênıke thawa ferq nêkena.
Beno sodır. Mem sono tever khe, cênıke pêyê meske de ra, do sanena. Peyê xo de qayt bena, hama xo ra nêçarnena. Mem, dest dano qıne rê, vêrono ra. Vano:
“Qe qına xo ra mesane, wo Mem bi sonde na .., na ....”. :oops:
Çıme: Wuşêno Heyderız
Payız-2005
M. Tornêğeyali
[url]: http://f25.parsimony.net/forum62148/messages/23457.htm
Re: MEMO BOM KAMO ?
dersim -Memo Bom ve hera xuya Pamuxe ra
Memo Bom ve hera xuya Pamuxe ra
Rozê, Memo Bom hera xuya Pamuxe cêno, sono zu dewe. Sar dorme de yeno tê arê, her zu çiyê pers keno.
Wertê ra jü ki vano:
“Apo, Pamuxe çutıriya?“ Mem vano: „Rında". Tenê khe mobet kenê, wuncia vano: „Apo, Pamuxe çutıriya?“ Mem, wuncia vano: „Rında". Tenê khe vêreno ra, mormek reyna pers keno: „Apo, Pamuxe çutıriya?“ Sabrê Memi beno teng, endi peqeno, vano:
„Gunê qurvu, Mem kokımo, Mem feqıro. To Memi pers nêkena, Pamuxe pers kena. Nê lao:
na Pamuxe maa to niya,
na Pamuxe waa to niya,
na Pamuxe pirika to niya,
ala mıra vaze,
na Pamuxe çıka tüya?" :lol:
02.02.2000
M. Tornêğeyali
[url]: http://f25.parsimony.net/forum62148/messages/23458.htm
Re: MEMO BOM KAMO ?
dersim -Mise ve Memê Bomi ra
Mise ve Memê Bomi ra
Rozê, Memo Bom sono zu dewe¹. Cênikê, yena lewe, kuna ra cı. Namê xo Mise biya. Vana, ‘Bomo, mı sere qeydê vaze”. Memo Bom vano, “Misê, so. Qe çêfê mı çino.” Mise zor kena, vana, “ila ki to, mı serê qeydê vazê.” Mem çare nêvineno, vano:
“Misa mına şise,
Bê, lewê mı de ronise,
Memo fam bıke,
Wurze, Misa xo ser nise!”
Mise vana, “ero lazê kutıki, to se vana?”
Naê ser, Bom vano:
“Memo, bêğuar, Memo bêğuar!” :lol:
Nusnoğ/Qeyd: M. Tornêğeyali
Çıme: Wuşêno Heyderız².
Tarıx u ca: 2005, Sıvıs
¹. Vatena Wuşênê Heyderıji ra, na mesela dewa Qaçağanê Hermeniyu de vêrda ra. Mise, Sawlıza.
². Wuşêno Heyderız (Hüseyin Güngör) 1939 de, waranê Tıri de amo dina. Warê Tıri, lêwe waranê Hemed Ağayi de, warê dewa Muqufiyê (Ünveren). Khalıkê xo ve piyê xo Aliyo Heyderız, Derê Heyderu ra, Tewnaşiye ra amê Muquf. Peydena şiyê Qaçağanê Hermeniyu. Vırende namê na dewe Tırki de ‘Ermeni Kaçağı’ bi. Nıka kerda Balyayla. Zu ki Kilsê Qaçağu esto. Kaçağan Kilisesi. Namê xuyo newe, ‘Balözü’yo. Mazrawa. ‘Balyayla’ ra gire dayıya.
[url]: http://f25.parsimony.net/forum62148/messages/23459.htm
Re: MEMO BOM KAMO ?
dersim -Xasiye
Xaşiye
Roza de zımıstani, dewe de alef qediyo, mal vêsan mendo. Ciamordê dewe kotê ra rae, şiyê khe dewa de bine ra alef biyarê. Sonê, xaşiyu sımer ra kenê pırr. Xaşiya de gırse, seveta Memi dawasnenê, dire kemeranê gırsu ki kenê cı. Her kes xaşiyê cêno, kunê ra rae. Xaşiya pile Memi rê manena. Mem kuno bınê xaşiye, gıraniye ra lıngê xo recefinê. Yi bini nanê pıra, sonê. Mem nia dano khe bese nêkeno cı reso. Sono lewê deri de xaşiye nano ro, sae keno khe kemeri tede rê. Kemeru vezeno, xaşiye cêno, sono, reseno cı. Yi ki xora sere vınıtê. Cıra pers kenê, vanê: „Memed, to koti menda?“
Memo Bom vano:
„Gunê qurvu, nezanon khe, na xaşiye kami nia dawasnayvi. Ezı ki maanê dinu hini bıdawasni!“ :lol:
10.02.2000
M. Tornêğeyali
[url]: http://f25.parsimony.net/forum62148/messages/23460.htm
Re: MEMO BOM KAMO ?
dersim -Memo Bom ve Cigara Fisqi ra
Cığara Fısqi-2
Memo Bom ve Cığara Fısqi ra!
Rozê, Memê Bomi hera xuya Pamuxe gureta, şiyo Derê Balabanu. Qewa de zu cığara wasta. Jü cêno, fısqi keno werte, cırê cığara piseno têra, danove cı. Memi fırtê ğunta. Mormeki cı ra pers kerdo, vato:
"Apo, cığara to çıturiya?"
Memi vato: "Zaf wesa."
Fırtê ra têpa wuncia pers kerdo.
Memi wuncia vato: "zaf wesa."
Raa hireine de khe pers kerdo, Mem endi damis nêbiyo, Vato:
"Gunê qurvu!
To yê çar lıngu kerdo werte,
yê dı lıngu ki cı khe, va pia bo;
wo ki şêro, bıreso roê ma u piyê to!” :o
(Amnana pêyene) 1998
M. Tornêğeyali
[url] http://f25.parsimony.net/forum62148/messages/23454.htm
Re: MEMO BOM KAMO ?
dersim -Memê Bomi ra Zu KILAME
KILAMA HESE
Nê dayê dayê, dayê dayê
Khılê mayê, Selê wayê
Mıno raê vete, kerde lete
Hese amê, vıreniya mı de vınıte [1]
Herme u sarê mıra goni vete.
Sate waê sate, deqa waê deqa
Bomi hewarê xo kerdo Mıhemedê Homete, lo!
Nê dayê dayê dayê dayê
Khılê mayê, Selê wayê
Yastuğe ver ra sonê leyi
Kafıre vejiye khe khudıkê xuyê teyi
Mı va ‘tersam çıke, na Memê Bomi buro’
Cafeliyê mı, bımano seyi, [2].
Sate waê sate, deqa waê deqa
Memi hewarê xo do qılawızê Hemê Seyi, lo! [3]
Nê dayê dayê dayê dayê
Khılê mayê, Selê wayê
Yastuğe vera sona dırrıke
Zalıme Bom fişto ve vırrıke
Niştaro mı ser, mı çermey kena
Jê qesavanê suke!
Sate waê sate, deqa waê deqa
Memi hewarê xo do qılawızê hewsê Diyarebıke, lo! [4]
Çıme: Memo Bom [5]
Vatoğ: Mıstafaê Keşki [6]
Arekerdoğ, qeydkerdoğ u nustoğ: M. Tornêğeyali
Miandonıke/Mazra Sılemanu [7], Amnan 2002 / Rastkerdene: Payızawertene, 2005
[1] Lawıke de, “vınete” vajino. Vınıtene ra yeno, mı yizna vatoği ra “vınıte” nusnê.
[2] Cafeli name lazê Memê Bomiyo. Wo vaxt xona qız biyo, belka wo taw, teyna jükek biyo.
[3] Hemê Sey, Khuresızo. Ewliya qebul beno. Hewısê Hemê Sey, Miandonıke de ro. Caê mezelu ra se mêtroy duriyo. Verê kemerê de gırşi de, zu kemero de qızo. Cıra Nisangê Hemê Seyi ki vajino. Beno khe, hewıs niyo teyna nisangeo. Zovina cau de ki nisangê Hemê Sey estê. Mesela wertê mazra Dapi u dewa Yarbaşi de Jiara Şêvze esta. Cıra Jiara Hemê Sey ya ki Nisangê Hemê Seyi ki vajino. Çê Hemê Sey, taxımê piranê Sılemananê. Sılemanu, pêra de aşira Balavanana (Balabanu ).
[4] Diyarebıke (Diyarevıke) Derê Balavanu de zu dewa. Vırende Erzıngani serê biye. Nıka Cimine (Üzümlü) ra giredayıya. Raa xo, Derê Arey (Değirmendere) de, lewê Pırdê Cıvıze (Cibice) ra bırina ra. Pêyê Reskê Menku de ra. Hewısê Diyarebıke ki, zu jiara. Derezaenê Çê Hemê Sey ra, Çê Xırxi (Çê Bava Memliyê Xırxi) wuza mendene u wayır vejiyenê. Darebıke/Darevıke ki vajina.
[5] Memo Bom, sayıro de gırso. Wertê Dêsımi de zanino. Her ca de zaravê dey, qesê dey amêne qeseykerdene. Çı hefkê ni nênuşiyê, gıran gıran benê vindi. Dey serê, Munzur Cömerti xeyle çiyo de rındek nusnayvi.
[6] Mıstafaê Keşki sayir niyo. Hama xundê sayirê hunerbendo. Xona weso, seşti ra nejdiyo.
[7] Miandonıke, dewa Mazra Sılemanu ra giredayiya. Derê Balavanu de, Pulêmoriye serewa.
Miandonıke (Miyandonıke, Mia-dunıke, Miya-dunıke; Monse de Mia-dune/Miya-dune esta.
Diyarebıke/Diyarevıke (Diyarê-buke); Darebıke/Darevıke (Darê-buke). Ez çıturi khe musu, mı hini nusnê. Karo bin, yê zonzanaoğu, tarıxzanaoğ u antropologano.
[url] http://f25.parsimony.net/forum62148/messages/23452.htm
Mit folgendem Code, können Sie den Beitrag ganz bequem auf ihrer Homepage verlinken
Weitere Beiträge aus dem Forum DERSÝM-ZAZA ARÞÝVÝ
Bagire_Bagire gölü - gepostet von dersim am Sonntag 14.10.2007
Miandonike - gepostet von dersim am Freitag 11.05.2007
PÜLÜMÜR GECESI - gepostet von dersim am Dienstag 05.06.2007
EUROPA II. DERSIM KULTURFESTIVAL - gepostet von dersim am Sonntag 27.05.2007
Ähnliche Beiträge wie "MEMO BOM KAMO ?"
Bom dias :B - *teenaqe.z0mbie (Freitag 28.10.2005)
MEMO BOM KAMO - dersim (Freitag 15.12.2006)
HPI vs. BOM - ffddhh (Donnerstag 13.09.2007)
Bom Chicka Wah Wah - thorax (Freitag 31.08.2007)
memo - memo (Sonntag 29.04.2007)
Samstag 26.03., 16-18 Uhr - Jiri (Mittwoch 23.03.2011)
Bom Chicka Wah Wah Oo - Blessi (Montag 18.06.2007)
Bom Chicki Wawaaaaaaaaahwaaaaaaaaaaaaaaaaaaaaaaahhhhhhhhh - Unholydonuts (Donnerstag 30.08.2007)
19. Spieltag,Athletic Bilbao-Valencia CF (18.1.09,19.00 Uhr) - littlevampire (Donnerstag 15.01.2009)
Memo an alle Mitarbeiter - seemann123 (Dienstag 19.06.2007)